Në kuadër të përmbushjes së obligimeve ligjore dhe me qëllim të hartimit të projekt buxhetit të orientuar sipas kërkesave dhe nevojave të qytetarëve të Komunës së Malishevës, kryetari i komunës, Ekrem Kastrati, nënkryetari Vesel Krasniqi, në bashkëpunim me Drejtorinë për Buxhet dhe Financa, kanë vazhduar edhe mbrëmë takimet me banorët e vendbanimeve.
Gjatë mbrëmjes u mbajtën takime në Këshillat Lokal të Banjë-Kërvasari dhe Lladroc-Senik, ku u prezantua buxheti, planifikimet komunale dhe njëkohësisht u dëgjuan drejtpërdrejt nga qytetarët nevojat, propozimet dhe mendimet e tyre për orientimin e investimeve kapitale në vitet në vijim, me theks të veçantë për vitin 2026.
Kryetari Kastrati dhe drejtori për buxhet, Blerim Thaçi, i informuan qytetarët për Kornizën Afatmesme Buxhetore 2026–2028 dhe për planifikimet e këtij viti, si dhe për mënyrën e shpenzimit të buxhetit aktual. Ata theksuan se shumë projekte do të përmbyllen brenda këtij viti, duke krijuar më shumë hapësirë për investime nëpër fshatra.
Qytetarët vazhdojnë të kërkojnë investime në infrastrukturën e përgjithshme, përfshirë rrugët, kanalizimet, trotuaret, ndriçimin publik dhe të tjera. Ndër sfidat kryesore në këto vendbanime mbetet furnizimi me ujë të pijshëm, megjithëse kjo është përgjegjësi e kompanisë “Hidroregjioni Jugor”.
Qytetarët kanë kërkuar ndërhyrjen e komunës për të siguruar një menaxhim më të mirë të sistemit të ujësjellësit, pasi, edhe pse ka ujë, furnizimi është i paqëndrueshëm ose mungon fare në disa zona.
Kryetari Kastrati theksoi se është angazhuar maksimalisht dhe do të vazhdojë të angazhohet për zgjidhjen e kësaj çështjeje, pasi është një shqetësim i përbashkët. “Edhe pse menaxhimi i ujësjellësit dhe kanalizimit është kompetencë e një organi tjetër, komuna ka investuar dhe ia ka dorëzuar sistemet të gatshme Hidroregjionit, ndërkohë që qytetarët paguajnë për shërbime, por menaxhimi nuk është në nivelin e duhur. Prandaj, ne do të vazhdojmë të angazhohemi për një zgjidhje të qëndrueshme të këtij problemi,” tha Kastrati.
