Nën organizim të Kryetarit ë Komunës së Malishevës, Ekrem Kastrati dhe të Organizatave të dala nga lufta e UÇK- dega në Malishevës, me një pjesëmarrjeje nga të gjitha trojet shqiptare, u mbajt akademi përkujtimore, në një vjetorin e ndarjes nga jeta të djalit, veprimtarit, luftëtarit dhe komandantit të Ushtrisë Çlirimtare të Kosovës, Naser Shala – Komandant “Ftyra”, ku , Kosova dhe mbarë kombi shqiptar përulen me nderim të thellë para veprës dhe sakrificës për çlirim, liri dhe shtetndërtim ku kontribuoi Naser Shala.
Në ceremoninë përkujtimore morën pjesë dhe mbajtën fjalë rasti: kryetari i Komunës së Malishevës, Ekrem Kastrati, i cili vlerësoi lart figurën e Komandant “Ftyrës” si simbol të përkushtimit dhe sakrificës për atdheu e shtetndërtim të Republikës së Kosovës.
Bashkëluftëtari i tij, Komandant “Çeliku”, Fatmir Limaj, solli kujtime nga ditët e luftës dhe qëndresës si dhe pas pavarësisë së Kosovës, angazhimi i Naserit ishte shumë i domosdoshëm për kohën të cilën veproi dhe ndihmoi me dijen dhe profesionalizmin në institucionet e shtetit, kur kujtojmë jetën dhe veprën e tij, rikujtojmë edhe amanetin e brezit të luftës: ruajtjen e lirisë, forcimin e shtetit dhe bashkimin shpirtëror e kombëtar të shqiptarëve. Emri i tij tashmë është i gdhendur jo vetëm në gur, por në historinë e lavdishme të luftës sonë çlirimtare dhe në kujtesën kolektive të popullit shqiptar, tha mes tjerash Limaj.
Figura e Naser Shalës – Komandant “Ftyra” – mbetet një shembull i gjallë i guximit, besnikërisë dhe dashurisë për atdheun. Ai ishte ndër ata bij që nuk kursyen asgjë për lirinë e Kosovës, duke e vendosur interesin kombëtar mbi gjithçka, theksoi në fjalën e rasti, ish kryeministri i Kosovës, Ramush Haradinaj.
Përfaqësuesi I OVL-së UÇK-së në Malishevës, Metush Kryeziu, theksoi se vepra e luftëtarëve të lirisë mbetet udhërrëfyes për brezat që vijnë me sakrificën që ata bën në luftë dhe paqe.
Në një dimension shkencor, kontributin e luftëtarit Naser Shala e elaburoi, Historiani, Ibrahim Gashi. Në këtë akademi përkujtimore, Gjeneral, Agim Çeku, ia dorëzoi Bislim Shalës, djalit të Naserit, uniformën e veteranit të UÇK-së.
Në këtë përkujtim morën pjesë edhe familjet e Komandant Kumanovës, familja e Tahir Sinanit, familjarë të presidentit Hashim Thaçi, të kryeparlamentarit Kadri Veseli, dhe shumë personalitetet tjera të jetës ushtarake, politike dhe shoqërore.
Pati edhe pika artistike , kushtuar Naser Shalës e si premierë ishte kënga e shkruar nga bashkëluftëtari, Rexhep Selimi. ‘Legjendë e Gjallë’, dhe recital, zgjohu Kosovë.
Në këtë ditë përkujtimore, u bë edhe zbulimi i pllakës përkujtimore, në fshatin Banjë për luftëtarin Naser Shala, si dëshmi e përhershme e kontributit të tij të madh që dha për lirinë e Kosovës dhe shtetndërtimit të sajë e ku folën Halit Krasniqi dhe Fatmir Shurdhaj.
Në fund, Bislim Shala në emër të familjes falënderoi gjithë pjesëmarrësit.
Lavdi e përjetshme jetës dhe veprës së Naser Shalës – Komandant “Ftyra”!
Lavdi të gjithë dëshmorëve të kombit!
