Me një aksion simbolik të zhvilluar sot në fshatin Lladroc, është përmbyllur aksioni njëmujor për pastrimin e ambientit në hapësirat publike në Komunën e Malishevës. Megjithatë, përkushtimi për një mjedis të pastër nuk përfundon këtu, pasi komuna do të vazhdojnë me largimin e mbeturinave inerte dhe me fushata të reja vetëdijesimi.
Sipas udhëheqësit të taskforcës komunale për ambient dhe nënkryetarit të komunës, Vesel Krasniqi, puna do të vazhdojë me identifikimin, pastrimin dhe grumbullimin e deponive ilegale të mbeturinave inerte në vendet e caktuara për këtë qëllim.
Në aksionin e sotshëm përmbyllës, të udhëhequr nga drejtori i Drejtorisë së Shërbimeve Publike, Izet Hoti, dhe drejtori i Drejtorisë së Administratës, Argjend Thaçi, morën pjesë zyrtarë komunalë, njësia e “Ekoregjionit” në Malishevë, asamblistë lokalë, si dhe nxënës e mësimdhënës.
Me këtë rast u dhanë mesazhe të rëndësishme për ruajtjen e ambientit. Drejtori Hoti mbajti një ligjëratë për rëndësinë e një mjedisi të pastër dhe përgëzoi banorët e Lladrocit për përkujdesjen ndaj ambientit në fshatin e tyre.
Ndërkohë, zyrtari komunal në Drejtorinë e Shërbimeve Publike, Naser Morina, bëri të ditur se përveç largimit të deponive me mbeturina inerte, do të vazhdohet edhe me aktivitete dhe fushata vetëdijesuese, përmes ligjëratave dhe njoftimeve publike lidhur me mbrojtjen e ambientit dhe menaxhimin e mbeturinave.
Aksioni “Për Malishevën e pastër” ka dëshmuar se përmes bashkëpunimit të institucioneve dhe qytetarëve mund të arrihen rezultate konkrete, ndërsa sfida për ruajtjen e një ambienti të pastër mbetet një angazhim i përhershëm.
