Kryetari i Komunës së Malishevës, Ekrem Kastrati, gjatë takimeve konsultative për hartimin e projekt buxhetit për vitin 2026, ka deklaruar se ndër shumë qëllime që synohen, me rëndësi të veçantë për komunën janë urbanizimi i fshatrave dhe krijimi i një qytetarie aktive, me qëllim të arritjes së objektivave si shoqëri dhe si komunë.
Këto komente Kastrati i bëri gjatë prezantimit të Kornizës Afatmesme Buxhetore (KAB), së bashku me drejtorin e Drejtorisë për Buxhet dhe Financa, Blerim Thaçi, dhe Zyrtaren Kryesore Financiare, Valentinë Krasniqi, në takimet me Këshillin Lokal për Damanek, Bubël dhe Qypevë, si dhe me Këshillin Lokal për Panorc, Rud dhe Llapçevë, që përmes investimeve konkrete të realizohen këto dhe të ruhen vlerat dhe ambienti, e këtë më së miri e bëjmë ne vet si qytetarë.
Gjatë këtyre takimeve, kryetari Kastrati dhe drejtori Thaçi prezantuan qarkoren buxhetore, me theks të veçantë buxhetin për vitin 2026, vit në të cilin pritet të fillojnë investimet në fshatra, me qëllim të urbanizimit të tyre, pasi tashmë investimet e mëdha në qytet janë drejt përfundimit.
Kërkesat e qytetarëve gjatë këtyre takimeve ishin që të investohet në infrastrukturë, duke përfshirë rregullimin e kolektorit kryesor të ujërave të zeza, i cili lidh 80 për qind të vendbanimeve të Malishevës, si dhe ndërtimin e trotuareve, rrugëve, kanalizimeve dhe ndriçimit publik.
Një ndër kërkesat më të theksuara për rregullimin e infrastrukturës rrugore ishte edhe rruga për te Ujëvarat e Mirushës dhe ajo që çon te Shpella e Flladit në Panorc, të cilat kanë ndikim të drejtpërdrejtë në zhvillimin e turizmit, pasi janë destinacione turistike shumë të vizituara. Ujëvarat e Mirushës dhe pishinat natyrore në Banjë, përfshirë edhe shpellën në Panorc, bëjnë pjesë në mesin e vendeve më të vizituara në Kosovë. Investimet në krijimin e infrastrukturës ndihmojnë zhvillimin e mëtejshëm të turizmit, si dhe mbrojtjen dhe promovimin e trashëgimisë natyrore.
