Komiteti për Komunitete, si organ i Kuvendit të Komunës së Malishevës, ka mbajtur sot mbledhjen e katërt të rregullt, ku janë diskutuar disa çështje me rëndësi për komunitetin. Në pikën e fundit të rendit të ditës, kryesuesi i komitetit, Amrush Helshani, ka shprehur mirënjohje për të gjitha vendbanimet ku qytetarët janë të organizuar vullnetarisht në shërbim të komunitetit.
“Organizimet vullnetare në disa nga fshatrat e komunës sonë janë të jashtëzakonshme dhe po bëjnë një punë të lavdërueshme në shërbim të komunitetit, përfshirë mirëmbajtjen, rregullimin dhe ruajtjen e hapësirave publike, formimin e grupeve vullnetare si dhe organizime të tjera të ngjashme”, ka deklaruar Helshani, duke shprehur falënderim publik në emër të Komitetit.
Gjatë mbledhjes, është bërë edhe një prezantim i punës së Zyrës për Ndihmë Juridike në Malishevë. Prezantimi është mbajtur nga përgjegjësi i kësaj zyreje, Agron Kastrati, i cili ka sqaruar procedurat për përfitimin e këtyre shërbimeve, kategoritë përfituese si dhe fushat juridike në të cilat ofrohen këshillime dhe ndihmë.
Sipas Kastratit, gjatë vitit 2024 kjo zyrë ka trajtuar gjithsej 222 raste të natyrave të ndryshme.
