Nënshkruhet Memorandum Bashkëpunimi për fuqizimin e grave sipërmarrëse në Kosovë. Në ambientet e Komunës së Malishevë u nënshkrua Memorandumi i Bashkëpunimit ndërmjet kryetarit të komunës, Ekrem Kastrati, dhe drejtorit të projektit zbatues, Valentin Hoxha, për realizimin e projektit “Fuqizimi i grave sipërmarrëse në Kosovë”.
Ky memorandum shënon fillimin e bashkëpunimit institucional për mbështetjen dhe avancimin e rolit të grave në fushën e ndërmarrësisë, me fokus në krijimin e mundësive të reja ekonomike, trajnime profesionale, mentorim dhe qasje në financim.
Projekti do të zbatohet nga Fondacioni për Zhvillim të Qëndrueshëm Ekonomik – Preda Plus Kosovë, me qëllim të fuqizimit ekonomik të grave dhe rritjes së pjesëmarrjes së tyre në tregun e punës dhe në zhvillimin lokal.
Kryetari Kastrati theksoi se Komuna e Malishevës mbetet e përkushtuar për të mbështetur iniciativat që kontribuojnë në barazi gjinore dhe zhvillim të qëndrueshëm ekonomik, ndërsa drejtori Hoxha vlerësoi bashkëpunimin me institucionet lokale si kyç për suksesin e projektit.
Ky memorandum pritet të hapë rrugë për iniciativa konkrete që do të ndikojnë drejtpërdrejt në përmirësimin e pozitës ekonomike të grave në nivel local, theksoi koordinatorja, Valentinë Krasniqi – Zogaj.
