Komuna e Malishevës ka vazhduar me mbajtjen e dëgjimeve buxhetore edhe në fshatrat Carrallukë, Shkarashnik, Drenoc dhe Vërmicë, në kuadër të procesit të planifikimit të buxhetit për vitet e ardhshme. Takimet janë organizuar në Këshillat Lokale të këtyre fshatrave, me pjesëmarrje të gjerë të qytetarëve.
Në këto dëgjime kanë marrë pjesë Kryetari i Komunës së Malishevës, Ekrem Kastrati, drejtori për Buxhet dhe Financa, Blerim Thaçi, si dhe Zyrtarja Kryesore Financiare, Valentinë Krasniqi.
Prezantimin e buxhetit e ka bërë drejtori Thaçi, ndërsa për planifikimet dhe projektet prioritare ka folur kryetari Kastrati. Ai ka theksuar rëndësinë e pjesëmarrjes aktive të qytetarëve në këtë proces, duke potencuar se dëgjimet organizohen me qëllim të rritjes së transparencës, planifikimit të përbashkët të projekteve, dhe përfshirjes së drejtpërdrejtë të komunitetit në vendimmarrje.
Motoja e këtyre dëgjimeve është “Urbanizimi i fshatrave”, që reflekton përkushtimin e Komunës për zhvillimin e barabartë të të gjitha zonave rurale.
Kërkesat më të shpeshta të qytetarëve kanë qenë të fokusuara në përmirësimin e infrastrukturës rrugore, sigurimin e ujit të pijshëm dhe mbështetjen për zhvillimin e bujqësisë.
Komuna e Malishevës do të vazhdojë me këtë praktikë gjithëpërfshirëse, duke synuar ndërtimin e një buxheti që pasqyron nevojat reale të qytetarëve.
