Në kuadër të aksionit ekologjik “Për Malishevën e pastër”, sot janë zhvilluar aktivitete pastrimi dhe vetëdijësimi në fshatrat Bubavec dhe Kijevë, me pjesëmarrjen e gjerë të qytetarëve dhe nxnësve.
Aksionit i kanë prirë drejtorët komunalë Jakup Gashi dhe Sylë Dukolli, ndërsa në këtë aktivitet janë përfshirë edhe zyrtarë të tjerë komunalë, qytetarë, nxënës, mësimdhënës, si dhe njësia e “Ekoregjionit” në Malishevë.
Gjatë aktivitetit, drejtori i Inspektoratit, Jakup Gashi, mbajti një ligjëratë për rëndësinë e ruajtjes së ambientit, duke theksuar se aksioni do të vazhdojë gjatë gjithë vitit. Ai paralajmëroi gjithashtu për pasojat ndaj atyre që nuk respektojnë rregullat dhe ndotin mjedisin.
Me këtë rast, Gashi falënderoi dhe përgëzoi qytetarët për angazhimin e deritanishëm, duke veçuar edhe iniciativat lokale, sidomos në Kijevë, ku një grup vullnetarësh të organizuar në formë fondacioni kanë realizuar aksione të vazhdueshme për pastrimin dhe rregullimin e ambientit. Po ashtu edhe fshati Bubavec, ditë më parë ka ndërmarrë aksion pastrimi të ambientit.
Aksioni “Për Malishevën e pastër” po vazhdon të shtrihet në të gjitha vendbanimet e komunës, duke synuar krijimin e një ambienti më të pastër dhe rritjen e përgjegjësisë qytetare për mbrojtjen e natyrës.
