Kryetari i Komunës së Malishevës, Ekrem Kastrati, ka pritur sot, në një takim pune Koordinatorin për Zhvillim të Organizatës së Kombeve të Bashkuara (OKB) në Kosovë, Stephen O’Malley, me të cilin ka diskutuar për forcimin e bashkëpunimit ndërinstitucional dhe mundësitë e reja për zhvillim të qëndrueshëm ekonomik në nivel lokal.
Në takim morën pjesë edhe përfaqësuesja e UN Women në Kosovë, Vlora Nushi, përfaqësuesja e FAO në Kosovë, Armanda Jahja, nënkryetari i Komunës së Malishevës, Vesel Krasniqi, drejtori i Drejtorisë për Bujqësi, Sylë Dukolli, si dhe drejtori i Drejtorisë për Zhvillim Ekonomik dhe Turizëm, Arbër Kastrati.
Gjatë takimit, kryetari Kastrati prezantoi angazhimet dhe prioritetet e Komunës së Malishevës në drejtim të zhvillimit ekonomik, përmirësimit të mirëqenies së qytetarëve dhe realizimit të projekteve me ndikim për qytetarët. Ai po ashtu i njoftoi të pranishmit me sfidat me të cilat përballet komuna, si dhe me nevojat prioritare që kërkojnë mbështetje dhe partneritet institucional.
Bashkëbisedimi u fokusua në identifikimin e mundësive konkrete për thellimin e bashkëpunimit ndërmjet Komunës së Malishevës dhe agjencive të OKB-së, me theks të veçantë në zhvillimin ekonomik lokal, bujqësinë, fuqizimin e grave, zhvillimin rural dhe promovimin e iniciativave që kontribuojnë në zhvillim të qëndrueshëm.
Të dyja palët shprehën gatishmërinë për të vazhduar bashkëpunimin dhe për të koordinuar veprimet në realizimin e projekteve që sjellin një zhvillim të qëndrueshëm të Komunës së Malishevës.
