Kryetari i Komunës së Malishevës, Ekrem Kastrati, i shoqëruar nga drejtori i Drejtorisë së Inspektoratit, Jakup Gashi, dhe drejtori i Drejtorisë së Bujqësisë, Syl Dukolli, ka takuar kryetarin e Përfaqësisë Turke në kuadër të KFOR-it në Kosovë, Taxhedin Genç.
Me këtë rast, kryetari Kastrati i uroi mirëseardhje dhe suksese Gençit në detyrën e tij të re, duke shprehur mirënjohjen për angazhimin e forcave turke në Kosovë dhe kontributin e tyre të vazhdueshëm në ruajtjen e sigurisë, si dhe në mbështetjen e aktiviteteve të ndryshme me interes për qytetarët.
Gjatë takimit u diskutua për mundësitë e zgjerimit të bashkëpunimit ndërmjet Komunës së Malishevës dhe KFOR-it Turk, me theks të veçantë në realizimin e aktiviteteve konkrete në territorin e Komunës së Malishevës, në përputhje me kapacitetet dhe mundësitë e KFOR-it.
Ndër çështjet e diskutuara ishin mundësitë e mbështetjes për hapjen dhe rregullimin e rrugëve fushore, si dhe pastrimin dhe mirëmbajtjen e shtretërve të lumenjve dhe rrjedhave ujore, me qëllim të përmirësimit të qarkullimit të ujit dhe parandalimit të pengesave në rrjedhën e tij.
Po ashtu, palët shprehën gatishmërinë për të zgjeruar bashkëpunimin edhe në fusha të tjera, përfshirë arsimin, kulturën dhe artizanatin, përmes projekteve dhe aktiviteteve të përbashkëta në shërbim të qytetarëve të Komunës së Malishevës.
Në përfundim të takimit, u shpreh vullneti i përbashkët që komunikimi dhe bashkëpunimi të vazhdojnë edhe në të ardhmen, me synimin që mundësitë e diskutuara të konkretizohen në projekte dhe aktivitete konkrete.