Në përgjigje të thirrjes së Organizatës së Veteranëve të Luftës së UÇK-së, drejtuar komunave në nivel vendi, që me rastin e përvjetorit të arrestimit të ish-krerëve të UÇK-së të organizojnë aktivitete simbolike, edhe Komuna e Malishevës ka organizuar një aktivitet të tillë, përmes të cilit është shprehur pakënaqësia ndaj procesit gjyqësor në Hagë dhe solidariteti me ish krerët e UÇK-së.
Aktiviteti është udhëhequr nga kryetari i Komunës së Malishevës, Ekrem Kastrati, ndërsa në këtë aktivitet ka marrë pjesë edhe kryetari i degës së OVL-UÇK-së në Malishevë, Metush Kryeziu.
Me këtë rast, kryetari Kastrati ka ritheksuar qëndrimin e Komunës së Malishevës lidhur me procesin gjyqësor në Hagë, duke e vlerësuar atë si të padrejtë, si dhe ka shprehur gatishmërinë e institucionit që të vazhdojë të jetë në mbështetje të vlerave kombëtare dhe historisë së luftës çlirimtare.
Përmes këtij aktiviteti simbolik, Komuna e Malishevës rikonfirmon edhe njëherë përkushtimin për respektimin dhe ruajtjen e vlerave të luftës së drejtë dhe çlirimtare të Ushtrisë Çlirimtare të Kosovës.
